مشكلتي مع 9 مايو .. :)

لي صديقه هي الأقرب

وهي طيبه وقلبها أبيض بس مشكلتها عصبيه ما تعرف أبوها لي عصبت ( برج ثور) ..

في سنه من سنوات الرفجه الطيبه ، كانت كارهه عيشتها ، و متأثره من أمور سيئه مرت في حياتها في ذيك السنه ، فبعصبيه - لا تقبل الهزار والغشمرة الثقيله مني – قالت لي : " حتى عيد ميلادي ما أبي أذكره هالسنه ورجاءاً لا تذكريني فيه".
فمرت السنه هذي و فعلاً ما دزيت لها لا هدية و لا مسج و بالاتصال سويت نفسي نسيت أن اليوم عيد ميلادها وكملت المكالمة عادي.

عدت السنة على خير .

بس مشكلتي علّقت على هالموضوع سنين .. فكل 9 مايو أتذكر أن اليوم عيد ميلادها ، و أقول ما أِبي أهنيها لأنها قالت لي السنة اللي فاتت لا تذكريني فيه ، لكن ما أصبر و أدز مسج أقول لها فيه " التزاماً بعهد السنة اللي فاتت .. " عاد أهي تفهمها ..

لكن كل سنه أحصلي زفه : ) .. تقول لي : " ... و بعدين ترى مو السنة اللي فاتت قلت لج لا تذكّريني في عيد ميلادي السالفه صار لها أربع سنين " ..

صار عندي رهاب من 9 مايو .. : )

و مشكلتي ذاكرتي إنتقائيه و نسايه !

شنو الحل بزفة كل سنة .. ما أدري !!